കള്ളുഷാപ്പുകളുടെ വൃത്തി ഉറപ്പാക്കാന്‍ ഹൈക്കോടതിയില്‍ ഹര്‍ജി

കൊച്ചി: സംസ്ഥാനത്തെ കള്ളുഷാപ്പുകള്‍ എലിയും പാറ്റയുമൊന്നുമില്ലാതെ വൃത്തിയോടെയാണ് പ്ര!വര്‍ത്തിക്കുന്നതെന്ന് ഉറപ്പാക്കണമെന്നാവശ്യപ്പെട്ട് ഹൈക്കോടതിയില്‍ ഹര്‍ജി. പാലക്കാട് മുടപ്പല്ലൂര്‍ സ്വദേശി എ. ഷാബു അഡ്വ. പി.ബി. സഹസ്രനാമന്‍ മുഖേന സമര്‍പ്പിച്ച ഹര്‍ജി ജസ്റ്റിസ് കെ.എം. ജോസഫ് അധ്യക്ഷനായ ഡിവിഷന്‍ ബെഞ്ച് അടുത്ത ആഴ്ചയ്ക്ക് മാറ്റി.
നിലവില്‍ വളര്‍ത്തുമൃഗങ്ങളും എലിയും മറ്റും അടുക്കളയിലും ഭക്ഷണമുറിയിലും ഓടി നടക്കുന്ന വൃത്തിഹീനമായ സാഹചര്യത്തിലാണ് പല കള്ളുഷാപ്പുകളും പ്രവര്‍ത്തിക്കുന്നത്. കള്ളു ഷാപ്പുകളുടെ ശുചിത്വം ഉറപ്പാക്കാന്‍ നിയമമുണ്ടെങ്കിലും പാലിക്കപ്പെടുന്നില്ലെന്നാണ് പരാതി.
2002-ലെ കേരള അബ്കാരി ഷോപ്പ് നിയമത്തിലെയും ഫുഡ് സേഫ്റ്റി നിയമത്തിലെയും വ്യവസ്ഥകള്‍ കള്ളുഷാപ്പുകള്‍ പാലിക്കുന്നുവെന്ന് ഉറപ്പാക്കണമെന്നാണ് ആവശ്യം. അബ്കാരി ഷോപ്പ് നിയമത്തില്‍ കലവറ, പാചകമുറി, ഇരിപ്പിട സൗകര്യം, ടോയ്!ലറ്റ് തുടങ്ങിയവ വൃത്തിയായി പരിപാലിക്കണമെന്ന് വ്യവസ്ഥയുണ്ട്.
കള്ളുഷാപ്പുകളുടെ അവസ്ഥ പരിശോധിക്കാന്‍ കമ്മിറ്റിയെ വെക്കണമെന്ന് ഹര്‍ജിക്കാര്‍ ആവശ്യപ്പെട്ടു. പ്രവര്‍ത്തനം മെച്ചപ്പെടുത്താനുള്ള ശുപാര്‍ശകള്‍ സമര്‍പ്പിക്കാന്‍ കമ്മിറ്റിക്ക് നിര്‍ദേശം നല്‍കണം. സംസ്ഥാന സര്‍ക്കാറിനു പുറമേ എക്‌സൈസ് കമ്മീഷണറും ഫുഡ് സേഫ്റ്റി കമ്മീഷണറും ഹര്‍ജിയില്‍ എതിര്‍ കക്ഷികളാണ്.
Source:http://www.mathrubhumi.com/ernakulam/news/3020109-local_news-ernakulam-%E0%B4%95%E0%B5%8A%E0%B4%9A%E0%B5%8D%E0%B4%9A%E0%B4%BF.html